Samil acollerá unha oficina da Policía Local durante o verán

13 policías se encargarán este verán por cuarto ano do servizo de vixilancia dos areais vigueses. A dotación foi presentada onte polo alcalde de Vigo, Abel Caballero, e o concelleiro de Seguridade, Xulio Calviño, na praia de Samil, onde se instalará unha das novidades deste 2008. Samil acollerá unha oficina permanente para os usuarios, ubicada no paseo, e que complementa ao vehículo que se ven utilizando de xeito habitual e que será destinado este ano a O Vao. Outra novidade é as seis bicicletas coas que contarán os policías para exercer a súa labor. A campaña deu comezo o pasado 1 de xuño e se estenderá ata o vindeiro 30 de setembro. A sección policial de Seguridade Costa e Praia, como así se denomina á patrulla, está conformada por un Oficial e doce Policías que prestarán servizo nas praias do noso litoral en horarios de mañá e tarde, abarcando con iso a totalidade da xornada, para garantir así, a seguridade de todos os cidadáns a calquera hora do día. Os trece funcionarios destinados nas nosas praias ofrecerán ao cidadán un servizo integral, exercendo entre outras, as seguintes funcións: Seguridade Cidadá, Policía Administrativa, Vixilancia do tráfico, Oficina de denuncias, Oficina de información cidadá. Estes servizos se ofrecerán grazas a dotación da patrulla con medios técnicos, como a oficina permanente en Samil, un ordenador portátil para realizar de xeito inmediato as xestións propias do departamento, dous teléfonos móbiles (un deles para contacto co cidadán, no número 609 875 182), prismáticos para a vixilancia desde puntos estratéxicos, un lector de chips identificativos de cans, xunto coas seis novas bicicletas dotadas cos últimos e máis novidosos materiais do mercado.

Inaugurado en Navia o novo centro de formación da FOREM

O alcalde de Vigo, Abel Caballero, acudiu hoxe ao acto de inauguración do novo centro de formación que abre en Navia a Fundación Formación e Emprego de Galicia, a FOREM, iniciativa do sindicato Comisións Obreiras. Nas instalacións da rúa Teixugueiras, os alumnos poderán facer uso de dúas aulas de informática, un taller de electricidade, un aula polivalente e unha cociña industrial; instalacións na que se formarán tanto os desempregados como os traballadores en activo. A actividade principal da FOREM é a formación e a orientación, tanto unha coma outra enfocadas á capacitación e orientación dos traballadores e traballadoras cara ao emprego, co obxectivo de que a reciclaxe e a cualificación sexan continuas e que as mellores cualificacións conseguidas polos traballadores reflictan na mellora das súas condicións laborais. O alcalde de Vigo, pola súa banda, salientou a labor da Fundación na cualificación do capital humano, característica que Abel Caballero considera necesaria para o crecemento económico da cidade e para a obtención dun emprego "estable e de calidade", mostra dunha "sociedade moderna e avanzada".

Todo listo para o Torneo de Futbol Sala das Festas de Navia 2008

Xa está todo listo para que este próximo venres 6 de xuño bote a andar o Torneo de Futbol Sala das Festas de Navia 2008. Nesta nova edición dun dos eventos deportivos máis destacados da nosa parroquia, convertido case en acontecemento social, enfrontaránse 10 equipos con xogadores de tódolos barrios da parroquia de Navia. Os sete equipos disputarán o torneo por sistema de liguilla configurados en dous grupos de cinco. No Grupo A estarán os equipos: Siete Estrellas, Barrio Chino, Teixugueiras, Os do Cole e Sfinter. No Grupo B enfrontaránse os equipos: Quintela, Os Mallos, Droja no Cola Cao, Barrio NC e Samil Tesón. En contra do que se anunciara en dias previos, de novo nesta edición non haberá árbitros e serán os propios equipos de cada grupo os que dirixirán os encontros. (Calendario de encontros)

As regras este ano continúan a liña de edicións anteriores. A duración dos partidos será de 25 minutos cada tempo e cun tempo morto por equipo e parte. Cada equipo terá que dar o nome dos 3 xogadores que ten de fóra da parroquia e non poderá cambialos ao longo do torneo. O gardamallas pode saír da súa área. Este cando realice o saque de porta, o seu balón non poderá botar en campo contrario. Se así fose, sinalizaríase falta no lugar do bote do balón. As faltas non son acumulables e son todas directas. As barreiras gardarán unha distancia de 5 pasos. O saque de banda e corner realizarase coa man. Todo xogador que cometa unha infracción grave non xogará en todo o torneo e consideraránse infraccións graves as seguintes: agresión ao contrario, agresión ao árbitro, insultos ao árbitro e realizar entradas sen posibilidade de disputar o balón. Como en anos anteriores mantense a controvertida medida de que o equipo que non se presente a arbitrar quedará automaticamente eliminado da competición.

Excursión de fin de curso organizada pola Vocalía da Muller

A Vogalía da Muller da Asociación Veciñal de Navia organiza unha excursión de fin de curso a Camposancos e Tui o próximo xoves 12 de Xuño, con saida ás 16.00 horas, dende a sede veciñal. Tódalas mulleres interesadas deberán inscribirse antes do 9 de xuño e abonar o billete, de 5 euros para as socias, e de 8 euros para as mulleres non socias da entidade veciñal. A Vogalía convida á bebidas e subvenciona parte da viaxe á tódalas mulleres participantes. Para máis información dirixirse á oficina da asociación veciñal o chamar ao 986 241 534.

Convocada asemblea de propietarios do PAU Navia

A Asociación de Propietarios das Fases IIIB, 4ª, 5ª e 6ª do PAU Navia convocou aos seus asociados para este xoves 9 de xuño á unha Asemblea Extraordinaria. A reunión, que se celebrará no salón de actos do Colexio Amor de Diós a partir das 20.00 horas, só poderán asistir aqueles asociados propietarios de terrenos debidamente acreditados. Entre os temas a tratar están o proceso de negociación e expropiación por parte da Consellería de Vivenda para executar as fases restantes do PAU Navia.