Centros de atención de patoloxías neurolóxicas en Navia

Nos próximos meses comezarán a implantarse en Navia importantes infraestructuras socio-sanitarias. As primeiras en chegar serán dous centros que prestarán servizos de atención a persoas con patoloxías neurolóxicas situados en 2 parcelas da III Fase-A do PAU Navia. En concreto será un Centro de atención a persoas con paralise cerebral que ocupará unha superficie de 4.000 metros cadrados na parcela S-4-1, e un Centro de atención a persoas con dano cerebral adquirido que ocupará unha superficie de 2.500 metros cadrados na parcela contigua S-4-2. O Concello de Vigo publicou o pasado 13 de febreiro o expediente (Expte. 1621-241) co prego de cláusulas administrativas para a regulación do procedemento licitatorio polo que se vai rexer o contrato administrativo especial co que se permitirá a utilización privativa das dúas parcelas sitas na III Fase-A do Plan Parcial de Navia para a implantación destes servizos. O uso das parcelas para explotación privada dos socio-sanitarios será por un periodo de 75 anos. As dúas parcelas están ubicadas no extremo norleste da parcela E-4, destinada nun principio a usos dotacionais, entre o centro educativo de primaria CEIP Alfonso R. Castelao e a rúa Pedra Seixa e o vial 2-f ainda sen denominación oficial. Ao outro lado deste último vial, fronte as parcelas estará ubicado o futuro centro de saúde de Navia. Nas parcelas xa está traballando maquinaria pesada para preparar o terreo para as futuras obras.